කැලරි දහනය කරවන සරල ක්‍රම

කැලරි දහනය කිරීම සඳහා ව්‍යායාම කිරීම හෝ දිවීම වැනි සාම්ප්‍රදායික ක්‍රම වලට අමතරව තවත් උපක්‍රම තිබෙනවා. අපගේ දෛනික ජීවිතයේ සාමාන්‍ය කටයුතු තුළින්ද කැලරි දහනය කළ හැකියි. උදාහරණ ලෙස, ගෙදර දොර පිරිසිදු කිරීම, මල් වවා රැක බලා ගැනීම, දරුවන් සමඟ සෙල්ලම් කිරීම, පඩිපෙළ නැගීම හෝ සාප්පු සවාරි යාම වැනි දේ මගින්ද කැලරි දහනය වේ. මේවා විනෝදජනක හා ප්‍රයෝජනවත් වන අතර, ඔබට දැනෙන්නේ නැතිවම ශරීරයට ව්‍යායාම ලැබෙනවා. එබැවින් දෛනික කටයුතු කරන අතරතුර වැඩිපුර සිරුර චලනය වන ආකාර ගැන සිතා බලා එවැනි කටයුතු වල නිරත වීමෙන් ඔබේ කැලරි දහනය කර ගන්න පුළුවන්. අද අපි එවැනි උපක්‍රම ගැන කතා කරමු. 

සිනහව කියන්නේ සෞඛ්‍යයට ඉතා හිතකර දෙයක්. ඊට අමතරව කැලරි දහනය කිරීමටද උපකාරී වන සරල ක්‍රමයක්. හදවතින් නික්මෙන සැබෑ සිනහවක් මිනිත්තු 10-15ක් පවතින අතර එම කාල සීමාව තුළ කැලරි 10-20ක් පමණ දහනය වේ. මෙය ඔබේ හෘද ස්පන්දන වේගය ඉහළ නංවන අතර, මානසික සුවයද වැඩි දියුණු කරවයි.

දිනපතා වැඩිපුර සිනාසීමට විනෝදජනක ටෙලි නාට්‍ය හෝ චිත්‍රපට නරඹන්න. මිතුරන් සමඟ හාස්‍ය ජනක දේවල් කතා කරන්න. හාස්‍ය ජනක  පොත් කියවන්න. සතුටුදායක මතකයන් සිහිපත් කරන්න. සිනහව තුළින් ශාරීරික හා මානසික යහපත ලබා ගන්නා අතරම කැලරි දහනය කිරීමද කර ගත හැකිය.

වාඩි වී සිටින අතරතුර පවා කුඩා චලනයන් තුළින් කැලරි දහනය කර ගත හැකිය. රැස්වීම්වලදී, රූපවාහිනිය නරඹන විට හෝ පරිගණකය ඉදිරියේ වැඩ කරන විට පවා සරල ව්‍යායාම කළ හැකිය. පාද වලින් තට්ටු කිරීම, සැහැල්ලුවට පැද්දීම, මාපටැඟිලි චක්‍රාකාරව චලනය කිරීම, අසුනේ ඉඳගෙන කකුල් දිගු කිරීම, උරහිස් සැහැල්ලු ලෙස චලනය කිරීම වැනි සරල චලනයන් දිගටම කරගෙන යාමෙන් දිනකට සැලකිය යුතු කැලරි ප්‍රමාණයක් දහනය  කර ගත හැකිය.

චුවිංගම් සපා කෑම සරල පුරුද්දක් ලෙස පෙනුනත් එය කැලරි දහනය කිරීමට උපකාරී වන ක්‍රමයකි. විශේෂයෙන් සීනි රහිත චුවිංගම් සැපීම තුළින් පැයකට කැලරි 11ක් පමණ දහනය කර ගත හැකිය. මෙය හකු චලනය කරවන අතර, ආහාර වේල් අතර බඩගිනි දැනීම අඩු කිරීමටද උපකාරී වෙනවා.

දිගු වේලාවක් වාඩි වී සිටීම වෙනුවට සිටගෙන සිටීමෙන් වැඩි කැලරි ප්‍රමාණයක් දහනය කර ගත හැකිය. සිටගෙන සිටීමෙන් වාඩි වී සිටීමට සාපේක්ෂව 50%ක් පමණ වැඩි කැලරි ප්‍රමාණයක් දහනය වේ.

සීතල ජලයෙන් ස්නානය කිරීම කැලරි දහනය කිරීමට උපකාරී වන අතර, ශරීර සෞඛ්‍යයට බොහෝ ප්‍රතිලාභ ගෙන දෙනවා. සීතල ජලයට නිරාවරණය වූ පසුව, ශරීරය නැවත සාමාන්‍ය උෂ්ණත්වයට පැමිණීමට වැඩිපුර ශක්තිය වැය කරනවා. මෙය කැලරි දහනය වීමට හේතු වෙනවා.

දෛනික කටයුතු වලදී හැකි සෑම විටම වැඩිපුර ඇවිදීමට උත්සාහ කිරීම තුළින් කැලරි දහනය කර ගත හැකිය. මෙය ඉතා සරල නමුත් ඵලදායී ක්‍රමයකි. විදුලි සෝපානය වෙනුවට පඩිපෙළ භාවිතා කිරීම, බස් රථයෙන් එක නැවතුමක් කලින් බැස ඇවිදීම, කාර්යාලයේ වැසිකිළියට යාමේදී දුර මාර්ගය තෝරා ගැනීම, දුරකථන සංවාද අතරතුර ඇවිදීම වැනි උපක්‍රම භාවිතා කරන්න.

සීතල ජලය පානය කිරීම සෞඛ්‍යයට හිතකර වන අතර, කැලරි දහනය කිරීමටද උපකාරී වේ. සීතල ජලය පානය කරන විට, එය ශරීර උෂ්ණත්වයට ගැලපෙන පරිදි උණුසුම් කරවීමට ශරීරය අමතර ශක්තියක් වැය කරනවා. මෙය කැලරි දහනයට හේතු වෙනවා.

උපුටා ගැනීම: wellnessexpert