ජාත්‍යන්තර සතුටු දිනයේ දී සැබෑ සතුට තේරුම් ගමු..

භූතානය ලෝකයට ප්‍රකාශ කළේ සංවර්ධනය මනින මිනුම් දණ්ඩ වන දළ ජාතික නිෂ්පාදනයට වඩා දළ ජාතික සතුටත් ඉතාම වැදගත් වන බවය. මේ සංකල්පය අනුව එක්සත් ජාතීන්ගේ සංවිධානය 2012 වසරේ ජූලි දොළොස් වන දා 66/281 දරන යෝජනාවෙන් හැම වසරකම මාර්තු 20 වැනිදා ලෝක සතුටු දිනය ලෙස නම් කළේය.

සතුට නම් කුමක් ද? මානසික ධනාත්මක චිත්තවේගයක් ලෙස සතුට හැඳින්විය හැක. විවිධ පුද්ගලයන්හට සතුට ගෙන දෙන කරුනු විවිධාකාර වේ. ඒ කෙසේ වෙතත් සතුටින් සිටීමට අකමැති කවුරුන්ද?

සතුට, එසේත් නැතිනම් ප්‍රීතියෙන් සිටීමට ඕනෑම කෙනෙක් කැමතියි. සතුට ගැන විවිධ අයට විවිධ නිර්වචන තිබිය හැකියි. ඒ එක් එක් අය සතුටු වන ආකාරයත් එකිනෙකාට වෙනස් විය හැකියි. විවිධ අයට සතුට ගැන විවිධ නිර්ණායක තිබිය හැකි වුවත් ගෝලීය වශයෙන් පොදු නිර්ණායක සකස් කර එක්සත් ජාතීන්ගේ සංවිධානය විසින් එක් එක් රටවල ජීවත් වන අයගේ සතුට ගණනය කිරීමක් සිදුකරයි.

ලෝකයේ වැඩිපුරම සතුටින් සිටින රාජ්‍යය වන්නේ පින්ලන්තයයි. පින්ලන්තය වසරේ වැඩි කාලයක් සෙල්සියස් අංශක 20 කට අඩු කටුක සීතලක් ඇති හිරු එළිය පවා හරිහැටි නොලැබෙන රටකි. පසුගිය අවුරුදු හයේම ලෝකයේ සතුටින් සිටින රට බවට පත්ව ඇත්තේ පින්ලන්තයයි. 

ඉතිං, සතුට හඳුනාගැනීම යනු වෙනම වැඩකි. සතුට අත්පත් කර ගැනීමට පෙර සතුට යනු කුමක්ද යන්න හඳුනාගත යුතුය. සැබෑ සතුට යනු කුමක් ද? එය චතුරාර්ය සත්‍යය අවබෝධ කරගත්තා හා සමාන මානසික සතුටකි. නියම සතුට හඳුනාගන්නා තැනැත්තා ආධ්‍යාත්මික වශයෙන් දියුණූ වූ පුද්ගලයෙක් වශයෙන් හැඳින්විය හැකිය.