90’s දරුවන්ට මුළු ලෝකයම කියා දුන් “විජය” පත්තරේ

අද වගේ ස්මාර්ට් ෆෝන්, යූටියුබ්, ටික්ටොක් හෝ ගූගල් නැති ඒ සුන්දර අතීතයේ.. හැම බදාදාවකම උදේට ඉස්කෝලේ යන්න කලින් පත්තර කඩේ ළඟ නතර වෙලා, රුපියල් දහයකට/ විස්සකට අරන් බෑග් එකේ දාගත්ත “විජය” පත්තරේ මතකද?

අපේ ළමා කාලයට පාට එකතු කරපු, අපිට මුලින්ම ලෝකය දකින්න “ජනේලය” ඇරලා දුන්නු විජය ළමා පුවත්පත ගැන නොදන්න කෙනෙක් අද ලංකාවේ නැති තරම්.

කවදාද මේ සුන්දර ගමන ආරම්භ වුණේ?

විජය පුවත්පතේ ඉතිහාසය දිව යන්නේ 1980 දශකයේ මුල් භාගයටයි. විජය පුවත්පත් සමාගමේ (Wijeya Newspapers) සභාපති රංජිත් විජයවර්ධන මහතාගේ සංකල්පයකට අනුව, 1980 වසරේදී තමයි මේ අපූරු ළමා පුවත්පත ලාංකීය දරුවන් වෙනුවෙන් මුලින්ම නිකුත් කෙරුණේ. එතැන් පටන් දශක හතරකට වැඩි කාලයක් ලංකාවේ අංක එකේ ළමා පුවත්පත බවට පත්වෙන්න මෙයට හැකි වුණා.

පළමුවැනි පත්තරේ සහ එදා විස්තර

එදා මුල්ම යුගයේ විජය පත්තරේ පිටු අතර තිබුණේ අදටත් වඩා වෙනස්ම කලාවක්. පරිගණක අකුරු (Fonts) සහ ඩිජිටල් චිත්‍ර නැති ඒ කාලේ, පත්තරේ තිබුණු ලස්සන චිත්‍ර, සිතියම් සහ කාටූන් බොහොමයක් ඇන්දේ අතින්!

ලෝකයේ අද්භූත තැන්, වනජීවී තොරතුරු, විද්‍යාත්මක සොයාගැනීම් වගේම ළමයින්ගේ අධ්‍යාපනයට අවශ්‍ය කරන ශිෂ්‍යත්ව අත්වැල, සාමාන්‍ය දැනුම ප්‍රශ්න පත්තරේ වගේ හැමදේම සිංහලෙන් සරලව කියවන්න ලැබුණේ මේ පිටු අතරින්. විශේෂයෙන්ම “අපේ පිටුව”ට තමන්ගේ කවියක්, චිත්‍රයක් දාලා, කවදාහරි තමන්ගේ නම පත්තරේ පළවෙයිද කියලා බලන් හිටපු ළමයි එදා ඕනෑතරම් හිටියා.

අද වෙනකොට තත්ත්වය මොකක්ද?

කාලයත් එක්ක ලෝකය ඩිජිටල්කරණය වුණා. අද දරුවන්ගේ අතේ පත්තර වෙනුවට තියෙන්නේ ටැබ් එකක් හෝ ස්මාර්ට් ෆෝන් එකක්. හැබැයි තාක්ෂණය කොච්චර වෙනස් වුණත්, විජය පත්තරේ තමන්ගේ අනන්‍යතාවය අතහැරියේ නැහැ.

අද වන විටත් විජය පුවත්පත මුද්‍රිත මාධ්‍යයෙන් (Printed) සතිපතා නිකුත් වන අතරම, කාලයට ගැළපෙන විදියට E-paper (ඩිජිටල් පුවත්පතක්) සහ නිල වෙබ් අඩවියක් ඔස්සේ අන්තර්ජාලයටත් එකතු වෙලා තියෙනවා. ඒ වගේම සමාජ මාධ්‍ය හරහාත් (Facebook/YouTube) දරුවන්ට සහ දෙමාපියන්ට වටිනා අධ්‍යාපනික සහ සාමාන්‍ය දැනුම තොරතුරු සමීප කරන්න ඔවුන් කටයුතු කරනවා.

ස්මාර්ට් ෆෝන් එකේ එක ක්ලික් එකකින් මුළු ලෝකෙම තොරතුරු හොයන්න පුළුවන් අද කාලේ ඉන්න අයට, එදා බදාදා උදේට විජය පත්තරේ අතට ගනිද්දී දැනුණු ඒ සතුට සහ කුතුහලය කවදාවත් තේරුම් ගන්න බැරි වෙයි.

පොඩි කාලේ විජය පත්තරේ ගත්තම ඔයාලා මුලින්ම කියවපු පිටුව මොකක්ද? ඔයාලගේ චිත්‍ර, කවි පත්තරේ පළවෙලා තියෙනවාද? මතකය අලුත් කරන් යමු!

උපුටා ගැනීම : Unknown Diary