“මරණයේ වෙළෙන්දා” ලොව උතුම්ම මිනිසා වූ හැටි

ඇල්ෆ්‍රඩ් නොබෙල්ගේ අදහාගත නොහැකි පෙරළිය!

ලෝකයේ සාමය වෙනුවෙන් දෙන ඉහළම ගෞරවය “නොබෙල් ත්‍යාගය” කියලා අපි හැමෝම දන්නවා. ඒත් ඒ ත්‍යාගය පිටුපස තියෙන්නේ බෝම්බ සහ මරණය පිළිබඳ බියකරු කතාවක් කියලා ඔබ දන්නවාද?

කවුද මේ ඇල්ෆ්‍රඩ් නොබෙල්?

1833 දී ස්වීඩනයේ උපන් ඇල්ෆ්‍රඩ් නොබෙල් කියන්නේ දක්ෂ රසායන විද්‍යාඥයෙක් සහ ඉංජිනේරුවෙක්. ඔහු කුඩා කාලයේ සිටම පුපුරන ද්‍රව්‍ය ගැන පර්යේෂණ කරන්න දැඩි කැමැත්තක් දක්වපු කෙනෙක්. ඔහුගේ පියාත් බෝම්බ සහ පතල් උපකරණ හදපු අයෙක් නිසා ඇල්ෆ්‍රඩ්ට ඒ ජානවලින්ම උරුම වුණා.

ලොව කැළඹූ සොයාගැනීම්

ඇල්ෆ්‍රඩ් නොබෙල් සිය ජීවිත කාලය තුළ පේටන්ට් බලපත්‍ර 355ක් ලබා ගත්තා. ඒ අතරින් ප්‍රධාන ඒවා මෙන්න:

• ඩයිනමයිට් (Dynamite): ඔහුගේ සුපිරිම සොයාගැනීම. එතෙක් පැවති අනතුරුදායක “නයිට්‍රොග්ලිසරින්” වෙනුවට ආරක්ෂිතව එහා මෙහා ගෙන යා හැකි ප්‍රබල පුපුරන ද්‍රව්‍යය ඔහු නිර්මාණය කළා.

• ඩෙටනේටරය (Detonator): ඕනෑම පුපුරන ද්‍රව්‍යයක් පාලනයක් සහිතව පත්තු කරන්න පුළුවන් තාක්ෂණය ඔහු හඳුන්වා දුන්නා.

• ජෙලිග්නයිට් (Gelignite): ජලයට ඔරොත්තු දෙන, ඩයිනමයිට් වලටත් වඩා බලවත් පිපිරුම් ද්‍රව්‍යයක්.

සොයාගැනීම් නිසා සිදු වූ දේ

නොබෙල් ඩයිනමයිට් හැදුවේ පතල් කැණීම් සහ පාරවල් හැදීම වගේ සංවර්ධන වැඩවලට උදව් වෙන්න. ඒත් ලෝකය කළේ ඒකෙ අනිත් පැත්ත:

1. යුද්ධ සඳහා යොදා ගැනීම: රටවල් එකිනෙකා මරාගන්නා මහා පරිමාණ යුද්ධ වලට මේ බෝම්බ යොදාගත්තා.

2. මහා ජීවිත විනාශය: දහස් ගණන් මිනිසුන් නොබෙල්ගේ සොයාගැනීම් නිසා මියගියා.

3. පවුලේ ඛේදවාචකය: පර්යේෂණයක් අතරතුර සිදුවූ පිපිරීමකින් ඔහුගේම සහෝදරයෙකු වූ “එමිල්” මියගියා.

ජීවිතය වෙනස් කළ ඒ “වැරදි” පුවත!

1888 දී ඇල්ෆ්‍රඩ්ගේ තවත් සහෝදරයෙක් වුණු ලුඩ්විග් මියගියා. ඒත් ප්‍රංශ පුවත්පතක් හිතුවේ මියගියේ “ඇල්ෆ්‍රඩ් නොබෙල්” කියලා. ඔවුන් පුවත්පතේ මෙහෙම හෙඩ්ලයින් එකක් දැම්මා:

“මරණයේ වෙළෙන්දා මියයයි! (The Merchant of Death is Dead)”

“මිනිසුන්ව ඉක්මනින් මරා දැමිය හැකි ක්‍රම සොයාගෙන ධනවත් වූ පුද්ගලයා ඊයේ මියගියේය.”

තමාව ලෝකය දකින්නේ මෙහෙමද කියලා කියවපු ඇල්ෆ්‍රඩ් ගැස්සුණා. තමන් මැරුණට පස්සේ ලෝකය තමන්ව මතක තබා ගන්න ඕනේ “මිනීමරුවෙක්” විදිහට නෙවෙයි, “මානව හිතවාදියෙක්” විදිහට කියලා ඔහු තීරණය කළා.

ලෝකය වෙනුවෙන් කළ කැපකිරීම

තමන්ගේ වැරදි ප්‍රතිරූපය වෙනස් කරන්න ඔහු අපූරු වැඩක් කළා. ඔහු මියයන්න කලින් තමන්ගේ අතිවිශාල ධනයෙන් 94%ක්ම වෙන් කළා ලෝකයට සේවය කරන අයට ත්‍යාග දෙන්න.

ඒ අනුව තමයි අද අපි දකින නොබෙල් ත්‍යාගය බිහිවුණේ:

• භෞතික විද්‍යාව, රසායන විද්‍යාව, වෛද්‍ය විද්‍යාව, සාහිත්‍යය සහ සාමය වෙනුවෙන් විශිෂ්ට සේවයක් කරන අයට වාර්ෂිකව මේ ත්‍යාගය පිරිනමනවා.

තමන් අතින් වුණු වැරැද්දක් හදාගෙන, මරණය වෙනුවට ජීවිතය සමරන්න පදනම දාපු ඇල්ෆ්‍රඩ් නොබෙල් කියන්නේ ඇත්තටම ආදර්ශමත් මිනිසෙක්.

උපුටා ගැනීම : Unknown Diary