අහසින් ගිය දඬුමොණරය පිටුපස ඇති ඇත්තම කතාව මෙන්න!

රාවණා රජ්ජුරුවෝ කිව්ව සැනින් අපේ මතකයට එන්නේ දඬුමොණරය! ලංකාවේ අහසින් ගිය ඒ පුෂ්පක විමානය ගැන, රාවණාගේ ගුවන් තොටුපොළවල් ගැන අපි කොච්චර නම් කතා අහලා තියෙනවද නේද?

වාරියපොළ, තොටුපොළ කන්ද, ගුරුළුපොළ කිව්ව ගමන් අපිට හිතෙන්නේ ඒ කාලේ ලංකාවේ නියම ගුවන්තොටුපොළවල් තිබ්බා කියලා! ඒත් ඇත්තටම රාවණාට අහසින් යන ගුවන් යානයක් තිබුණද? නැත්නම් මේක හුදෙක් අපේ ජනප්‍රවාදයේ තියෙන තවත් එක ලස්සන කතාවක් විතරද?

මෙන්න මේ ප්‍රශ්නයට අද අපි සැබෑ පුරාවිද්‍යාත්මක සහ විද්‍යාත්මක සාක්ෂි එක්කම උත්තර හොයලා බලමු!

ගොඩක් අය හිතන්නේ වල්මිකී රාමායණයේ සහ අපේ ජනකතාවල කියවෙන මේ දඬුමොණරය කියන්නේ ඇත්තටම එන්ජින් එකකින් හරි එහෙමත් නැත්නම් රසදිය බලයෙන් හරි අහසින් ගිය සැබෑ යානයක් කියලා. හැබැයි පුරාවිද්‍යාත්මක පැත්තෙන් බැලුවොත්, අද වෙනකම් ලංකාවේ කිසිම තැනකින් මේ කියන ගුවන් යානාවල ලෝහ කොටසක්, යන්ත්‍ර සුන්බුන් හෝ යාන්ත්‍රික සැලසුමක් හමුවෙලා නැහැ!

ඒ වගේම අපේ අය ගුවන්තොටුපොළවල් කියලා හඳුන්වන වාරියපොළ හෝ තොටුපොළ කන්ද වැනි ස්ථානවල ඇත්තටම තියෙන්නේ ස්වභාවිකව හැදුණු භූ විෂමතාවයන් විතරයි. එතැන ගුවන් පථ තිබ්බා කියන්න කිසිම සාක්ෂියක් නැහැ.

එතකොට ගොඩක් අය කියන වෛමානික ශාස්ත්‍රය කියන පොත ගැන මොකද හිතන්නේ?

ඒ පොතේ පුරාණ ගුවන් යානා හදන හැටි ගැන තියෙනවා නේද කියලා ඔබට හිතෙයි! හැබැයි ඉන්දියාවේ ප්‍රමුඛ විද්‍යා ආයතනයක් වන Indian Institute of Science එකෙන් කරපු පර්යේෂණවලින් තහවුරු වුණේ මේ කියන පොත 20 වන සියවසේ මුල, ඒ කියන්නේ 1918 ත් 1923 ත් අතර කාලයේ රචනා වුණු එකක් කියලා! ඒ කියන්නේ ඒක පුරාණ පොතක් නෙවෙයි!

එහෙනම් කොහොමද මේ දඬුමොණර කතාව ආවේ?

ඉතිහාසඥයන් සහ පර්යේෂකයන් කියන්නේ මේකට හේතු කිහිපයක් තියෙන්න පුළුවන් කියලා. එකක් තමයි පුරාණ සාහිත්‍යයේ තියෙන රූපක සහ අලංකාරෝක්ති! ඒ කාලේ තිබුණු ඉතා වේගවත් ගමන්, නැව් හෝ විශාල රථ විස්තර කරන්න පැරණි ලේඛකයන් අහසින් ගියා වගේ උපමා භාවිත කළා වෙන්න පුළුවන්.

අනෙක් වැදගත්ම දේ තමයි, පුරාණ ලංකාව කියන්නේ නාවික වෙළඳාමේ සහ නෞකා තාක්ෂණයේ ඉතා ඉහළින්ම සිටි රටක්! ඉතින් මුහුදේ ගිය දියුණු යාත්‍රා, පස්සේ කාලෙක සාහිත්‍යයට එකතු වෙද්දී සංකේතාත්මකව විමාන ලෙස වෙනස් වුණා වෙන්නත් ලොකු ඉඩක් තියෙනවා!

කොහොම වුණත් එක දෙයක් පැහැදිලියි! විජයගේ පැමිණීමටත් පෙර ලංකාවේ ඉතා දියුණු මානව ශිෂ්ටාචාරයක් තිබුණා! ඒ අයගේ වාරි තාක්ෂණය, ගල් කැටයම්, ලෝහ භාවිතය සහ ජල කළමනාකරණය දිහා බලද්දී ඒක අදටත් අපිට හිතාගන්න බැරි තරම් ආශ්චර්යමත්!

ඒ කියන්නේ අපිට සැබෑ ලෙසම ආඩම්බර විය හැකි Lost Technology එකක් ලංකාවේ තිබුණා!

ඒත් සැබෑ ඉතිහාසය සහ ජනප්‍රවාදය කියන්නේ දෙකක්. දඬුමොණරය කියන්නේ අපේ සංස්කෘතියට, ජනප්‍රවාදයට සහ සාහිත්‍යයට ලොකු ආලෝකයක් එකතු කරපු, අපේ පැරණියන්ගේ තාක්ෂණික සිහින නිරූපණය කරන ඉතා ලස්සන කතාවක්!

හැබැයි විද්‍යාත්මකව සහ පුරාවිද්‍යාත්මකව තහවුරු වූ සාක්ෂිවලට අනුව නම්, අහසින් ගිය යානයක් ගැන තවම කිසිම සාක්ෂියක් හමුවෙලා නැහැ.

ජනප්‍රවාදයේ තියෙන ඒ රසය විඳින ගමන්ම, සාක්ෂි සහිත සැබෑ ඉතිහාසය අඳුරගන්න එක තමයි නුවණට හුරුම දේ! ඔබටත් මේ ගැන හිතෙන දේ අනිවාර්යයෙන්ම පල්ලෙහායින් Comment කරන් යන්න!

උපුටා ගැනීම : Hela Rahas