Mic
ජොන්කුච් “JK” මැක් යනු වයස අවුරුදු 18ක් පමණක් වූ, අඩි 7 අඟල් 6 (සෙන්ටිමීටර් 229) උසැති පැසිපන්දු ක්රීඩකයෙකි. එම උස නිසා ඔහු වර්තමාන NBA ලීගයේ ක්රීඩා කරන සියලුම ක්රීඩකයන්ට වඩා උසය. ඒ අතර සැන් ඇන්ටෝනියෝ ස්පර්ස් කණ්ඩායමේ සුපිරි තරුව වන වික්ටර් වෙන්බන්යාමා ද ඇතුළත් වේ.
JK මැක් 2007 ඔක්තෝබර් 8 වන දින ඕස්ට්රේලියාවේ පර්ත් (Perth) නගරයේ උපත ලැබීය. ඔහුගේ පවුලේ මුල් පදිංචිය දකුණු සුඩානයේ වූ අතර, පසුව කෙන්යාවට සංක්රමණය වී, JK මාස 11ක් වයසැති අවධියේ බටහිර ඕස්ට්රේලියාවේ පදිංචි විය. ඔහුගේ අසාමාන්ය උස පවුලේ උරුමයකි. ඔහුගේ පියා අඩි 6 අඟල් 8ක් උස වන අතර, සීයා අඩි 7ක් පමණ උසැති අයෙකු බව සඳහන් වේ.
JK මුලදී පැසිපන්දු ක්රීඩාවට විශේෂ උනන්දුවක් දැක්වූයේ නැත. වයස අවුරුදු 14දී ඔහුගේ මිතුරන් ඔහුගේ උස දැක ක්රීඩාවට යොමු කළහ. ඒ පිළිබඳව ඔහු මෙසේ පවසා ඇත:
“ඇත්තටම මාව පැසිපන්දු ක්රීඩාවට යොමු කළේ මගේ උස නිසා. ඒත් දැන් මම මේ ක්රීඩාවට ආදරෙයි. ක්රීඩා කරන්න පටන් ගත් දා සිටම එය මට විනෝදජනක අත්දැකීමක් වුණා.”
දැනට ඔහු Basketball Australia Centre of Excellence කණ්ඩායම වෙනුවෙන් NBL1 East තරගාවලියේ සෙන්ටර් (Center) ස්ථානයේ ක්රීඩා කරයි. එසේම ඔහු Australian Institute of Sport නියෝජනය කරන අතර, දේශීය ආදිවාසී සහ අප්රිකානු සම්භවයක් ඇති තරුණ ක්රීඩකයන්ට අවස්ථා ලබාදීම සඳහා පිහිටුවන ලද Perth Wildcats Academy හි පළමු කණ්ඩායමේ සාමාජිකයෙකි.
ඔහුගේ උස පමණක් නොව, එම උසට සාපේක්ෂව ඇති වේගය සහ ශරීරයේ නම්යශීලීභාවය ද විශේෂත්වයකි. දක්ෂතා සොයන්නන් (Scouts) පවසන්නේ මෙතරම් උස ක්රීඩකයෙකුට සාපේක්ෂව ඔහු ඉතා සැහැල්ලුවෙන් චලනය වන බවයි. ඔහුට පිටියේ වේගයෙන් දිව යාම, ආරක්ෂක ක්රීඩාවේ ඉක්මන් ප්රතිචාර දැක්වීම සහ පැනීමකින් තොරවම ඩන්ක් (Dunk) කිරීම පවා කළ හැකිය.
2025 NBL1 තරග වාරයේදී ඔහු තරගයකට සාමාන්යයෙන්:
ලකුණු 2.7ක්
රිබවුන්ඩ් 3.2ක්
බ්ලොක් 1.0ක්
වාර්තා කළ අතර, ක්ෂේත්රයෙන් (Field Goals) 70%ක සහ නිදහස් විසි කිරීමෙන් (Free Throws) ද 70%ක සාර්ථකත්වයක් ලබා ගත්තේය.
මෙතරම් විශාල ශරීරයකට හැඩගැසීම ඔහුට පහසු නොවීය. ඔහුගේ නියෝජිත සොලමන් ඩෙක් (Solomon Dech) පවසන පරිදි, පසුගිය වසර තුළ පමණක් JK සිය ශරීරයට කිලෝග්රෑම් 20ක මාංශ පේශී එකතු කරගෙන ඇත. එසේම දණහිස් ආබාධවලට මුහුණ දී ඇති ඔහු, දැන් තරග අතරතුර දණහිස් ආරක්ෂක (Knee Guards) භාවිත කරයි.
ඔහුගේ දක්ෂතා නිසා ඇමරිකාවේ ප්රමුඛ NCAA විශ්වවිද්යාල රැසක අවධානය ඔහු වෙත යොමු වී තිබේ. LSU, Colorado, Santa Clara, Charlotte, South Carolina සහ Washington State යන විශ්වවිද්යාල ඔහුට කැමැත්ත පළ කර ඇත
වයස අවුරුදු 18ක් පමණක් වන අතර තවදුරටත් උස යාමේ හැකියාවක් තිබිය හැකි JK මැක්, අද ලෝකයේ වඩාත්ම බලාපොරොත්තු සහගත තරුණ පැසිපන්දු දක්ෂයන් අතරින් එක් අයෙකු ලෙස සැලකේ. ඔහුගේ අවසන් ඉලක්කය වන්නේ NBA ලීගයට පිවිසීමයි.
මෙම ලිපිය පහත මූලාශ්ර ඇසුරින් සකස් කරන ලදී:
Basketball Australia – Centre of Excellence
NBL1 Australia – ක්රීඩක සංඛ්යාලේඛන
Australian Institute of Sport (AIS)
Perth Wildcats Academy
NCAA බඳවා ගැනීමේ (Recruiting) වාර්තා
ESPN සහ Yahoo Sports වාර්තා
247Sports / On3 Sports ක්රීඩා වාර්තා
Basketball Australia, NBL1 Australia, Australian Institute of Sport (AIS), ESPN, Yahoo Sports සහ NCAA බඳවා ගැනීමේ වාර්තා ඇසුරින් සකස් කරන ලදී.
උපුටා ගැනීම : අපි නොදුටු ලෝකය Api Nodutu Lokaya
