පෘථිවියේ දරුණුම අයිස් කලාපය පාලනය කරන “සැබෑ මාෆියාව”

පෙන්ගුයින්!

ලෝකයේ මිනිසෙකුට ජීවත් වෙන්න අමාරුම, දරුණුම දේශගුණයක් තියෙන අයිස් රාජධානිය ඇතුළේ තමන්ගේම නීති මාලාවන් ක්‍රියාත්මක කරන සුවිශේෂී ජීවියෙක් ඉන්නවා. ඒ තමයි පෙන්ගුයින්. හැබැයි උන්ගේ ජීවිතය අපි කාටූන්වල දකිනවා වගේ සුන්දර එකක් නෙවෙයි; ඒක තනිකරම පැවැත්ම වෙනුවෙන් කරන කපටි සටන්, හොරකම් සහ පාවාදීම්වලින් පිරුණු එකක්!

පෙන්ගුයින්ලාගේ ජීව විද්‍යාත්මක තොරතුරු

විද්‍යාත්මක කුලය (Family): පෙන්ගුයින්ලා අයත් වෙන්නේ Spheniscidae කියන පක්ෂි කුලයටයි. උන් පියාසර කිරීමට නොහැකි, හැබැයි වතුරේ පිහිනීමට උපරිමයෙන් හැඩගැසුණු සාගර පක්ෂීන් විශේෂයක්.

කොහේද ජීවත් වෙන්නේ? (Habitat): බොහෝ දෙනෙක් හිතන්නේ මුන් ඉන්නේ ඇන්ටාක්ටිකාවේ (දකුණු ධ්‍රැවයේ) විතරයි කියලා. හැබැයි පෙන්ගුයින්ලා බහුලවම ඉන්නේ පෘථිවියේ දකුණු අර්ධගෝලයේ (Southern Hemisphere). ඇන්ටාක්ටිකාවට අමතරව දකුණු අප්‍රිකාව, නවසීලන්තය, ඕස්ට්‍රේලියාව, පේරු සහ ගලපගෝස් දූපත් (Galapagos Islands) වැනි උණුසුම් කලාපවල පවා ජීවත් වන පෙන්ගුයින් විශේෂ ඉන්නවා. (හැබැයි මුන් උතුරු ධ්‍රැවයේ ස්වභාවිකව

ජීවත් වෙන්නේ නැහැ!)

ප්‍රමාණය (Size): වර්තමානයේ ලෝකයේ පෙන්ගුයින් විශේෂ 18ක් විතර ජීවත් වෙනවා. උන්ගේ ප්‍රමාණයන් එකිනෙකට වෙනස්:

ලොකුම පෙන්ගුයින්: ‘එම්පරර් පෙන්ගුයින්’ (Emperor Penguin) – උසින් අඩි 4ක් විතර වෙනවා වගේම බර කිලෝග්‍රෑම් 40කට වඩා වැඩියි.

කුඩාම පෙන්ගුයින්: ‘ලිට්ල් ප්ලූ පෙන්ගුයින්’ (Little Blue Penguin) – උස අඟල් 12-13ක් විතරක් වෙන, බර කිලෝග්‍රෑම් 1.5ක් විතර වෙන හුරුබුහුටි සතෙක්.

මොනවද කන්නේ? (Diet): පෙන්ගුයින්ලා කියන්නේ සම්පූර්ණයෙන්ම මාංශභක්ෂක සත්තු. උන් ප්‍රධාන වශයෙන්ම ආහාරයට ගන්නේ වතුරේ ඉන්න කුඩා මසුන් (Fish), දැල්ලන් (Squid), සහ ක්‍රිල් (Krill) කියන ඉතා කුඩා ඉස්සන් වැනි සත්ව විශේෂයි. උන් තමන්ගේ දවසෙන් වැඩි හරියක් ගත කරන්නේ වතුර යට මේ ආහාර සොයා ගැනීමටයි.

ගල් කැටයක් වෙනුවෙන් කෙරෙන “ලෝකයේ අමුතුම ආදරය”

පෙන්ගුයින්ලා කියන්නේ මුළු ජීවිත කාලයටම එකම සහකරුවෙක් (Monogamous) තබා ගන්නා ආදර්ශමත් සත්තු ජාතියක්. හැබැයි මුන්ගේ ආදරය ප්‍රකාශ කරන ක්‍රමය මරු. පිරිමි පෙන්ගුයින් සතා තමන් කැමති ගැහැණු සතාට ආදරේ ප්‍රකාශ කරන්නේ ලස්සනම ලස්සන, සිනිඳු ගල් කැටයක් (Pebble) හොයලා ගිහින් ඒක තෑගි කිරීමෙන්!

ගැහැණු සතා ඒ ගල් කැටය බාරගත්තොත් විතරයි උන් ජෝඩුව වෙන්නේ. හැබැයි මේ ගල් කැට හොයන එක ලේසි නැති නිසා, සමහර කපටි පෙන්ගුයින්ලා අනිත් උන් හොරකම් කරලා තියන ගල් කැට හොරෙන්ම උස්සනවා. ඒ අස්සේ ගල් කැට වෙනුවෙන් පෙන්ගුයින්ලා අතරේ දරුණු ගුටි කෙළිත් සිද්ධ වෙනවා!

හැම තත්පරේකම මරණය රැකගෙන ඉන්න “Ice Highway”

අයිස් කඳු උඩ හුරතල් වුණාට, වතුරට බැස්ස ගමන් මුන් නියම “Bullet” වගේ වේගවත්. හැබැයි වතුර ඇතුළේ මුන්ව දඩයම් කරන්න ලෙපර්ඩ් සීල්ලා (Leopard Seals) සහ ඕකා (Orca – Killer Whales) තිමංගලයන් කට ඇරගෙන බලාගෙන ඉන්නවා.

ඒ නිසා වතුරට පනින්න කලින් පෙන්ගුයින් රංචුවම අයිස් කන්ද අයිනට වෙලා සෑහෙන වෙලාවක් බලාගෙන ඉන්නවා. උන් කරන්නේ රංචුවෙන් එක්කෙනෙක්ව හොරෙන්ම වතුරට තල්ලු කරන එකයි! උන් බලාගෙන ඉන්නවා තල්ලු කරපු එකාට සතෙක් ලෙවල් දෙනවද නැද්ද කියලා. ඌ බේරුණොත් විතරයි අනිත් සේරම වතුරට පනින්නේ!

ඉස්සර හිටපු “මිනිස් සයිස්” යෝධ පෙන්ගුයින්ලා!

අපි අද දකින එම්පරර් පෙන්ගුයින්ලටත් වඩා, මීට වසර මිලියන ගණනකට පෙර පෘථිවියේ ජීවත් වුණු Palaeeudyptes klekowskii කියන ප්‍රාග් ඓතිහාසික පෙන්ගුයින් විශේෂය අඩි 6කට වඩා උසයි, බර කිලෝග්‍රෑම් 115කට වඩා වැඩියි! ඒ කියන්නේ සාමාන්‍ය මනුස්සයෙක් තරම් උස යෝධ පෙන්ගුයින්ලා තමයි ඉස්සර ලෝකේ සැරිසරා තියෙන්නේ.

තවත් විශ්මිත කරුණු කිහිපයක්

මුන් බොන්නේ ලුණු වතුර: පෙන්ගුයින්ලට කරදිය (ලුණු වතුර) බොන්න පුළුවන්. උන්ගේ ඇස්වලට උඩින් පිහිටලා තියෙන විශේෂ ග්‍රන්ථියකින් (Supraorbital Gland) වතුරේ තියෙන ලුණු සේරම පෙරලා ලේවලින් ඉවත් කරනවා.

කළු-සුදු කෝට් එක “Camouflage” එකක්: උන්ගේ බඩ සුදු පාට නිසා වතුර යට ඉන්න විලෝපිකයෙක් උඩ බලද්දී අහසේ එළියත් එක්ක සතා මඟහැරෙනවා. පිටිපස්ස කළු පාට නිසා උඩ ඉන්න කුරුල්ලෙක්ට වතුර යට අඳුරත් එක්ක සතාව පේන්නේ නැහැ.

දණහිස් තියෙනවා හැබැයි පේන්නේ නැහැ: බොහෝ දෙනෙක් හිතන්නේ පෙන්ගුයින්ලට දණහිස් නැහැ කියලා. හැබැයි උන්ට මිනිස්සුන්ට වගේම දණහිස් තියෙනවා, ඒක උන්ගේ ඝන පිහාටු අස්සේ හැංගිලයි තියෙන්නේ.

ස්වභාවධර්මයේ තියෙන අහිංසකම වගේම උපක්‍රමශීලීම කුරුලු විශේෂයක් වෙන පෙන්ගුයින්ලා, ඇත්තටම අපි හිතනවාට වඩා ගොඩක් වෙනස් සත්තු ජාතියක්!

පෘථිවියේ මෙවැනිම අද්භූත සහ නොඇසූ සත්‍ය

තොරතුරු දිනපතා දැනගන්න, අපේ පිටුව සමඟ දිගටම රැඳී සිටින්න!

උපුටා ගැනීම : Unknown Diary