ලෝකයේ කුඩාම කිඹුලා!

Dwarf Crocodile

අපි හැමෝම දන්නේ මීටර් 5ක් 6ක් දිග, දැක්කත් ඇඟ හිරිවැටෙන මිනී කන කිඹුල්ලු ගැනනේ. හැබැයි මුළු ජීවිත කාලෙටම අඩි 5කට වඩා දිග වෙන්නැති, බැලූ බැල්මට “කිඹුල් පැටියෙක්” වගේ පේන අපූරු කිඹුල් විශේෂයකුත් මේ ලෝකේ ඉන්නවා කිව්වොත් ඔබ විශ්වාස කරනවාද?

මුන්ට කියන්නේ “Dwarf Crocodile” කියලා. අද අපි කියන්න යන්නේ මේ පුංචි කිඹුල් ලෝකයේ සැඟවුණු අපූරු රහස් සහ විද්‍යාත්මක තොරතුරු කිහිපයක් ගැනයි.

විද්‍යාත්මක වර්ගීකරණය

මේ සතාගේ විද්‍යාත්මක නාමය වෙන්නේ Osteolaemus tetraspis. මුන් අයත් වෙන්නේ Reptilia (උරග) වර්ගයේ, Crocodilia (කිඹුල්) ගෝත්‍රයේ තියෙන “Crocodylidae” කියන සැබෑ කිඹුල් කුලයටයි. ඒ කියන්නේ Alligators හෝ Caimans ලා වගේ පවුල්වලට නෙවෙයි, මුන් නියම කිඹුල් පවුලේම සාමාජිකයෝ.

මුන් ජීවත් වෙන්නේ කොහේද?

කූට කිඹුල්ලු ස්වදේශිකව ජීවත් වෙන්නේ මධ්‍යම සහ බටහිර අප්‍රිකාවේ තියෙන කොංගෝ රාජ්‍යය, කැමරූන්, ගැබෝන් සහ නයිජීරියාව වගේ නිවර්තන කලාපීය රටවලයි. මුන් ප්‍රධාන වශයෙන්ම දකින්න ලැබෙන්නේ ඝන නිවර්තන වැසි වනාන්තර (Rainforests) තුළ තියෙන සෙමින් ගලා යන කුඩා දිය පහරවල්, වගුරු බිම් සහ කරදිය මිශ්‍ර නොවුණු මිරිදිය (Freshwater) ජලාශ ආශ්‍රිතවයි. ඇතැම් අවස්ථාවලදී වතුරෙන් පිටත ගොඩබිම තියෙන දිරාගිය ගස් කඳන් සහ පඳුරු අස්සේ තමන් විසින්ම හාරාගන්නා ගැඹුරු ගුල් (Burrows) තුළත් මුන් කාලය ගත කරනවා.

Dwarf කිඹුලාගේ අපූරු ලක්ෂණ 5ක්!

1 හැමදාම කිඹුල් පැටියෙක්!

වැඩුණු පිරිමි සතෙක් වුණත් උපරිම දිග වෙන්නේ මීටර් 1.5ක් (අඩි 5ක්) විතරයි. බර කිලෝග්‍රෑම් 18ක් 32ක් වගේ වෙන්නේ. ඒ කියන්නේ සාමාන්‍ය ලොකු බල්ලෙක්ගේ බර! ලෝකයේ ලොකුම කරදිය කිඹුලෙක් එක්ක බැලුවොත්, මුන් ඇත්තටම සෙල්ලම් බඩුවක් වගේ පොඩියි.

2 ඇඟ පුරාම තියෙන “Bulletproof” කබාය!

ප්‍රමාණයෙන් කුඩා නිසාම මුන්ට වෙනත් සතුරන්ගෙන් තියෙන තර්ජනය වැඩියි. ඒ නිසාම ස්වභාවධර්මයෙන් මුන්ට අපූරු ආරක්ෂාවක් දීලා තියෙනවා. මුන්ගේ බෙල්ල, පිට සහ වලිගය පුරාම තියෙන කොරපොතු (Osteoderms) අනිත් කිඹුලන්ට වඩා ගොඩක් ඝනකමයි වගේම ශක්තිමත්. ඒක හරියට ඇඟට දාපු Bulletproof ජැකට් එකක් වගේයි.

3 දවල්ට නිදාගෙන රෑට ගේම් දෙන වැසි වනාන්තරයේ “හොරා”!

මුන් දවල් කාලයේදී වතුර අයිනේ හෝ ගුල් අස්සේ හැංගිලා හොරට නිදාගන්නවා. හැබැයි ඉර බැහැලා කළුවර වැටුණාම තමයි මෙයා රජ වෙන්නේ. රාත්‍රී කාලයේදී තමයි මුන් ගොදුරු සොයාගෙන ඉතාමත් ක්‍රියාශීලී වෙන්නේ.

4 මෙනු එකේ තියෙන්නේ මොනවාද?

ලොකු කිඹුල්ලු වගේ මී හරක්, මුවන් දඩයම් කරන්න මුන්ට බැහැ. ඒ නිසා මුන්ගේ ප්‍රධාන ආහාරය වෙන්නේ මිරිදිය කකුළුවන්, ගෙම්බන්, මාළුවන්, කෘමීන් වගේම කුඩා ක්ෂීරපායී සතුන්.

5 අම්මෙක්ගෙන් ලැබෙන සුපිරි ආරක්ෂාව!

ගැහැණු සතා එක පාරකට බිත්තර 10ක් 20ක් වගේ සුළු ප්‍රමාණයක් තමයි දාන්නේ. හැබැයි බිත්තර ටික දම් පොළොව යට හංගලා, පැටව් එළියට එනකම්ම අම්මා සෙවනැල්ල වගේ මුර කරනවා. පැටව් එළියට ආවට පස්සෙත් වතුරට අරන් යන්නේ තමන්ගේ කට ඇතුළේ පරිස්සමට තියාගෙනයි.

ගොඩක් අය “Caiman” ලාවත් කිඹුල්ලු කියලා වැරදියට පටලවා ගන්නවා. කයිමන්ලා අතර මීටර් 1.2ක විතර පුංචි සත්තු (Cuvier’s dwarf caiman) ඉන්නවා. හැබැයි නියම කිඹුල් පවුලට (True Crocodiles) අයත් කුඩාම වීරයා තමයි මේ “Dwarf Crocodile”!

ඇඟෙන් පොඩි වුණත්, ස්වභාවධර්මයේ තියෙන අපූරු නිර්මාණයක් වෙන මේ පුංචි කිඹුලා ගැන ඔයා කලින් දැනන් හිටියාද? කමෙන්ට් එකක් දාගෙන යන්න!

උපුටා ගැනීම : Unknown Diary