ගිනිකොන ආසියාවේ අදෘශ්‍යමාන දඩයක්කාරයා

Malayan Pit Viper

ලෝකයේ දරුණුම සර්පයන් ගැන කතා කරද්දී බොහෝ දෙනෙකුට අමතක වන, නමුත් ගිනිකොනදිග ආසියාවේ වැඩිම මරණ සංඛ්‍යාවකට සහ ආබාධිත තත්ත්වයන්ට වගකියන සර්පයෙක් තමයි Malayan Pit Viper කියන්නේ. මොවුන්ගේ අසාමාන්‍ය දඩයම් උපක්‍රම සහ දරුණු විෂ නිසා මොවුන් සොබාදහමේ අතිශය භයානක නිර්මාණයක් බවට පත්ව තිබෙනවා.

විද්‍යාත්මක පසුබිම සහ කුලය

මොවුන් විද්‍යාත්මකව Calloselasma rhodostoma ලෙස හඳුන්වන අතර, අයත් වන්නේ Viperidae (පොළොං) කුලයටයි. වඩාත් නිවැරදිව කිවහොත් මොවුන් Crotalinae (පිට් වයිපර්ස්) උප කුලයට අයත් වෙනවා. මොවුන්ගේ ඇස් සහ නාස් පුඩු අතර ඇති තාප සංවේදී සිදුරු (Pits) නිසා මොවුන්ට මෙම නම ලැබී තිබෙනවා.

මොවුන් ජීවත් වන්නේ කොහේද?

මෙම සර්ප විශේෂය ප්‍රධාන වශයෙන් ගිනිකොනදිග ආසියාවේ රටවල ව්‍යාප්ත වී සිටිනවා.

• රටවල්: තායිලන්තය, මැලේසියාව, වියට්නාමය, කාම්බෝජය, ලාඕසය සහ ඉන්දුනීසියාවේ ජාවා දූපත වැනි ප්‍රදේශවල මොවුන් බහුලව දකින්න ලැබෙනවා.

• පරිසරය: මොවුන් ඝන වනාන්තරවලට වඩා වෙරළබඩ වනාන්තර, උණ වනාන්තර, රබර් වතු සහ මිනිසුන් වසන ප්‍රදේශවලට ආසන්න වතුපිටිවල ජීවත් වීමට වැඩි ප්‍රියතාවක් දක්වනවා. වියළි කොළ රොඩු බහුල බිම් මහල මොවුන්ගේ ප්‍රියතම වාසස්ථානයයි.

අදෘශ්‍යමාන දඩයක්කාරයා

මොහුගේ ඇඟේ තියෙන රටාව කොතරම් දක්ෂද කිව්වොත්, වියළි කොළ රොඩු උඩ ඉන්නකොට අඩියක් දුරින් හිටියත් ඌව හඳුනාගන්න බැහැ. මොවුන් “Ambush Predator” කෙනෙක්. ඒ කියන්නේ ගොදුර එනකම් එකම තැන පැය ගණනාවක් නොසෙල්වී බලා ඉන්නවා. සාමාන්‍යයෙන් බොහෝ සර්පයන් මිනිස් අඩි හඬක් ඇසුණු සැනින් පලා ගියත්, මේ සර්පයා පලා යන්නේ නැහැ. ඌ සිටි තැනම නිසොල්මන්ව සිටින නිසාම නොදැනුවත්වම මිනිස් පය මොහු මත තැබෙන අතර, ඒ සැණින් මොහු අකුණු වේගයෙන් කිහිප වරක්ම දෂ්ට කරනවා.

මස් දියකරන මාරක විෂ (Hemotoxic Venom)

මොහුගේ විෂ ශරීරගත වූ වහාම දෂ්ට කළ ස්ථානය අවට පටක සහ මස් පිපිරී විනාශ වෙන්න පටන් ගන්නවා (Necrosis). ඒ වගේම රුධිරය කැටි ගැසීමේ හැකියාව සම්පූර්ණයෙන්ම නැති කරලා දාන නිසා ශරීරයේ අභ්‍යන්තර අවයවවලින් පවා රුධිරය වහනය වෙන්න පුළුවන්. නිසි වෙලාවට ප්‍රතිවිෂ (Antivenom) නොලැබුණොත් අතක් හෝ කකුලක් කපා ඉවත් කරන්න පවා සිදු වන තරමට මෙය මාරාන්තිකයි.

කුණකටුවා සමඟ ඇති පුදුම සමානකම

මෙම සර්පයා අපේ රටේ ඉන්න කුණකටුවාට (Hump-nosed Viper) පුදුම සමානකමක් දක්වනවා. පෙනුමෙන් මෙන්ම හැසිරීමෙන්ද මොවුන් දෙදෙනා නෑදෑයන් වන අතර, ත්‍රිකෝණාකාර හිස සහ ශරීරයේ ඇති ත්‍රිකෝණාකාර අඳුරු ලප නිසා දෙදෙනාම එක හා සමානව දිස්වෙනවා. අපේ කුණකටුවා මෙන්ම මොහුද පලා නොයන ගතියක් පෙන්වන අතර, ප්‍රධාන වෙනස වන්නේ අපේ කුණකටුවාට වඩා මොහු ප්‍රමාණයෙන් විශාල වීමත් විෂ ඉතාමත් ප්‍රබල වීමත් පමණයි.

ඔබත් ආසියානු රටක සංචාරය කරනවා නම් හෝ වතුපිටිවල වැඩ කරන කෙනෙක් නම්, සැඟවී සිටින මෙවැනි “අලස” දඩයක්කාරයන් ගැන නිතරම විමසිල්ලෙන් ඉන්න!

මෙවැනි තවත් අද්භූත සතුන් ගැන දැනගන්න අපේ පිටුවත් සමඟ එකතු වෙන්න.

උපුටා ගැනීම : Unknown Diary