අපේ හඬ ජාත්‍යන්තරයට ඇහිලා

සුනිල් කොස්තාගේ නවතම ටෙලි නිර්මාණය can you hear me මේ දිනවල ඉහළ ප්‍රේක්ෂක ප්‍රතිචාර මාධ්‍යයේ ජාතික රූපවාහිනිය හරහා විකාශනය වෙනවා. පසුගිය වසරේ රයිගම් ටෙලි සම්මාන උළෙලේදී නැගී එන නිළිය ලෙස සම්මානය පාත්‍ර වූ මිචෙල් දිල්හාරා can you hear me ටෙලි නාට්‍යයේ ප්‍රධාන භූමිකාවකට පණ පොවනවා. මේ මිචෙල් එක්ක අපි කළ කතාබහ.
කොහොමද can you hear me සඳහා ලැබෙන ප්‍රතිචාර?
තාම ටෙලි නාට්‍යයේ කොටස් කිහිපයක් විතරයි විකාශනය වෙලා තියෙන්නේ. මේක ඇත්තටම වෙනස්ම තේමාවක් යටතේ කරපු වෙනස්ම වැඩක්. ඒ හින්දා විකාශනය වෙලා තියෙන්නේ කොටස් කිහිපයක් විතරක් වුණත් ඒ සඳහා ලැබෙන ප්‍රතිචාර ඉතාම ඉහළයි. මේ වගේ නිර්මාණයක් සඳහා සම්බන්ධ වෙන්න මට අවස්ථාව ලබා දීපු එක ගැන නැවත වරක් මම සුනිල් කොස්තා මහත්මයාට ස්තුතිවන්ත වෙනවා.
can you hear me හරහා ශ්‍රී ලංකේය ටෙලි නාට්‍යයක් පළමුවරට ජාත්‍යන්තර තලය දක්වා ගෙන යෑමේ උත්සාහයකුත් අපි දැක්කා. ඒ ගැන පොඞ්ඩක් කතා කරමු?
ඔව්. can you hear me පැ ඉංග්‍රීසි උපසිරැසි සහිතව අන්තර්ජාලයට එක් කරනවා. එහෙම දෙයක් ලංකාවෙදි වෙන්නේ පළමු වරට. ඒ උත්සාහය ගොඩක් සාර්ථක බව දැනටමත් අපට දැනිලා තියෙනවා. මොකද මේ වෙද්දිත් ජපානය, ඉන්දියාව සහ බංගලාදේශය වගේ රටවල ප්‍රේක්ෂකයෝ බොහෝ දෙනෙක් අන්තර්ජාලය හරහා අපට ප්‍රතිචාර දක්වලා තියෙනවා. ඒ අය මේ නාට්‍ය නරඹන බවත්, නාට්‍ය ඉතාම හොඳ බවත් ප්‍රකාශ කරලා තියෙනවා. ඒ ගැන හරිම සතුටුයි.
can you hear me අනෙක් ටෙලි නාට්‍යවලින් වෙනස් වෙන්නේ කොහොමද? එහි ප්‍රධාන භූමිකාවක් රඟදක්වන ශිල්පිනියක් විදියට ඒක ඔබට දැනෙන්නෙ කොහොමද?
අපේ සමාජයේ හැංගිලා ඉන්න යථාර්ථවාදී චරිත ගැන තමයි මේකෙදි කතා කරන්නේ. මං හිතන්නේ ඒ හරහා කලාව අලුත් ප්‍රවණතාවයක් කරා ගෙන යනවා. ලංකාවෙ විතරක් නෙවෙයි ලෝකයේ කලාව ගැන කතා කළත්, ඒ බොහෝ නිර්මාණවලදී කතා කරන්නේ සමාජයේ කැපී පෙනෙන චරිත ගැන. උදාහරණයකට ස්පයිඩර් මෑන්, සුපර් මෑන් ගත්තත් ඒ අය සමාජයේ කැපී පෙනෙන චරිත. නමුත් can you hear me පැ හරහා කතා කරන්නේ සමාජයේ හඬක් නැති මිනිස්සු ගැන. ඇත්තටම සමාජයේ ජීවත් වෙන චරිත ගැන. මෙහි මගේ චරිතය ගත්තත් එහෙමයි. බේකරියක වැඩ කරන දුප්පත් තරුණියකගේ චරිතයකට තමයි මම පණ පොවන්නේ. එහි හිමිකරුගේ පීඩනය දරා ගන්න බැරි කමට රැකියාවෙන් ඉවත් වෙන්න ඇයට ඕනෑ වුණත් ගෙදර ප්‍රශ්න මතක් වෙද්දි ආපහු යන්න ඇයට බැහැ. එවැනි ආකාරයේ චරිත රැසක් මේ නාට්‍යයේ ඇතුළත් වෙනවා. සමාජයෙන් ඉලිප්පිලා නැති චරිත එළියට අරගෙන ඒ අයට හඬක් ලබා දීම තමයි මේ හරහා කරන්නේ.
පොඩි පත්තරකාරි විදියට ටෙලි නාට්‍ය කලාවට අවතීර්ණ වූ මිචෙල් ගැන බොහෝ දෙනෙක් කතා කරන්න වුණේ සුදු ඇඳගෙන කළු ඇවිදින් හරහා. ඒ සඳහා ඔබට සම්මාන පවා ලැබුණා. අපි ඒ ගැන කතා කරමු?
මගේ පළමුවැනි ටෙලි නාට්‍ය තමයි සල් සපු නා. එහි තමයි පොඩි පත්තරකාරිගේ චරිතය තිබුණේ. ඒකටත් හොඳ ප්‍රතිචාර ලැබුණා. ඊට පස්සේ තමයි මට සුදු ඇඳගෙන කළු ඇවිදින් සඳහා සම්බන්ධ වෙන්න අවස්ථාව ලැබුණේ. මං හිතන්නේ ඒක තමයි මගේ ජීවිතයේ හැරවුම් ලක්ෂ්‍යය. ඒ චරිතය වෙනුවෙන් මට පසුගිය රයිගම් ටෙලි සම්මාන උළෙලේදී නැගී එන නිළියට හිමි සම්මානය හිමි වුණා.
ඔබට මේ සම්මානය හිමි වෙන්නේ ඔබේ දක්ෂතාව අනුව. නමුත් අද ක්ෂේත්‍රයේ බොහෝ දෙනෙක් දුවන්නේ ජනප්‍රියත්වය පස්සේ. මිචෙල් දිල්හාරා ජනප්‍රියත්වය හඹා යන නිළියක් නෙවෙයිද?
මෙහෙමයි. මම ඇත්තටම සම්මාන බලාගෙන රඟපාන කෙනකුත් නෙවෙයි. අපිට ජනප්‍රියත්වය නැතුවත් බැහැ. හැබැයි ජනප්‍රියත්වය කියන්නේ අද ඇතිවෙලා හෙට නැතිවෙන දෙයක්. මම කරන චරිතය ප්‍රේක්ෂකයන්ගේ හිතේ හැමදාම රැඳිලා තියෙන්නයි මට ඕනෑ. ඒ වගේම ඒ චරිතය ඒ අයගේ ජීවිතයට සම්බන්ධයි කියලා ඒ අයට දැනෙනවානම් මං හිතන්නේ ඒක තමයි මට ලැබෙන හොඳම සම්මානය. මගේ රංගන පරාසය ඇතුළේ එවැනි නිර්මාණ සඳහා ලැබෙන චරිත තෝරා බේරා ගෙන මම රංගනයේ යෙදෙනවා.
ඔබ සම්මානනීය රංගන ශිල්පිනියක් වගේම ජාත්‍යන්තර සම්මාන දිනූ ලේඛිකාවක්. අපි ඒ ගැනත් පොඞ්ඩක් කතා කරමු?
මගේ පළමු පොත වුණේ Social Invisibility is not a Fiction it Exists. ඒක ඉංග්‍රීසි භාෂාවෙන් තමයි ලිව්වේ. ඒ සඳහා ඉන්දියාවේදී සම්මාන හිමි වුණා. මගේ දෙවැනි පොතෙත් වැඩ කටයුතු මේ වෙද්දී අවසන් අදියරට පැමිණිලා තියෙනවා. එයත් රචනා වෙන්නේ ඉංග්‍රීසි භාෂාවෙන්.
මේ පොත් පරිවර්තනයක් හරහා සිංහල පාඨකයන් වෙත ලබා දීමේ අදහසක් නැද්ද?
ඇත්තටම තියෙනවා. මගේ පළමු පොත පරිවර්තනය කිරීම සඳහා දැනටමත් මම කටයුතු කරගෙන යනවා. මේ පොත් දෙකම ඉදිරියේදී සිංහල පාඨකයන් වෙත ලබා දෙන එක මගේ බලාපොරොත්තුවක්.
චන්දන පොන්නම්පෙරුම